اسم المستخدم
يباب.كوم في 
في أبوظبي: انطلاق معرض العبايات والجلابيات تاريخ 30 مايو 
زرين شاه - Zareen Shah
منو الشخص إلي ممكن أتواصل وياه
زرين شاه.
شو اسم إلي تمكيج؟
زرين شاه.
شو العنوان؟
ما عندي محل حالياً لإستقبال الزباين لأني أشتغل بنظام الفريلانس.
تنبيه: هذه الصفحة مخصصة فقط للحريم, لانها تحتوي على صور خاصة بهن
تشتغلين من البيت ولا من صالون؟
ممكن اروح للزباين لبيوتهم أو في موقع الحفل مثل الفنادق. اذا الزبونة ما تقدر انها تستقبلني في بيتها مثلا، ممكن استقبلها عندي في البيت اذا لزم الأمر.
ممكن صور من الاعمال؟
هذه بعض الصور الجديدة لسنة 2010
و هذه بعض الصور الثانية:
و هذه مجموعة ثانية من الصور
عندج قائمة بالاسعار؟ كم اسعار المكياج الي تسوينه؟
المكياج العادي – في دبي: 600 درهم
مع رموش: إضافة 50 درهم
المكياج العادي – الشارقة: 800 درهم
(للمكياج في الشارقة، لازم يكون فيه حجز لعدد 3 أشخاص عشان ممكن اطلع من دبي، والا السعر المذكور للشخص الواحد راح يزيد)
المكياج العادي – العين و أبوظبي: 1,000 درهم
(للمكياج في العين و أبوظبي، لازم يكون فيه حجز لعدد 4 أشخاص عشان ممكن اطلع من دبي، والا السعر المذكور للشخص الواحد راح يزيد)
مكياج الخطوبة/الملجة/الحنا (شامل الرموش): 2000 درهم
مكياج العروس (يوم العرس) – في دبي: 4500 درهم
(السعر يعتمد اذا المكياج اللي بحطه ثقيل ولا لا)
مكياج العروس (يوم العرس) – خارج دبي: السعر يعتمد على الموقع, يرجى الاتصال للاستفسار
ممكن اتين الفندق او البيت عشان المكياج؟ حتى لو ماكانت العروس هي الي تبا تتمكيج؟
بما اني خبيرة مكياج بنظام فري لانس بدوام كامل، ممكن اروح للبيت أو الفندق ابتداء من المكياج العادي حتى مكياج العروس. إذا الزبونة برع دبي (ما عدا الشارجة)، لازم الزبونة اتوفر لي المواصلات تاخذني واتردني. ممكن اسوق لين الشارجة ولكن لازم ايكون على الأقل 4 أشخاص حاجزين معاي. الأسعار عادة اتكون أعلى للزباين برع دبي بسبب عامل الوقت وهو وايد مهم في شغلي
تمكيجين العروس و ربيعاتها و اهلها ليلة العرس ولا بس تركزين على العروس؟
ممكن احط مكياج لأهل العرس أو صديقات العروس بس لعدد 5 أشخاص كحد أقصى، وهذا يشمل العروس نفسها
السعر يختلف لو تمكيجين في البيت او الفندق؟
كل الأسعار اتكون نفس الشي ما عدا اذا كان المكياج برع دبي، فالأسعار ترتفع. نقطة مهمة حبيت اوضحها انه ساعات بعض الزباين يتصلون ويحجزون حق مكياج عادي، ويوم أسيرلهم، اتفاجأ انه حفلة الخطوبة أو الملجة للزبونة المتصلة. عادة المكياج العادي ياخذ مني 45 دقيقة. بس مكياج الخطوبة أو الملجة ايكون أثجل وياخذ مني ساعة ونص تقريبا. طبعا اذا الزبونة ما خبرتني بهالشي، راح اتصير عندي بعدين لخبطة في المواعيد وهذا يؤدي اني راح اتأخر عن المواعيد اللي عقب.
كيف ستايل المكياج؟ ثقيل ولا خفيف ولا عادي؟
فلسفتي في المكياج هو اظهار الجمال واني احط المكياج اللي يناسب كل وحدة. أنا اشتغل على الملامح و شخصية الزبونة واسألها شو اللي اتحب واللي ما اتحب. وبناء على هذا كله، احط لها مكياج يناسبها تماما.
شغفي في المكياج يوم احطه هو اني اتعامل مع البشرة، بحيث اني اؤمن انه أي وحدة من أي دولة أو أي فئة عمرية دايما اتحب انه بشرتها اتكون حلوة. الفاونديشن مصنوع خصيصا انه يعطيج مظهر احلى و مب عشان يخفي العيوب. ممكن اعتبر ستايلي في وضع المكياج مناسب، عصري، وجميل.
كم ياخذ وقت عشان تحطين مكياج للعروس؟
بعض العرايس يفضلون المكياج الثجيل ومتوسط الوقت اللي ياخذ مني هو ساعة ونص. بالنسبة للعروس انحط لها مكياج الجسم. هذا ياخذ عشر دقايق زيادة أو عشرين دقيقة اذا عندها وايد حبوب وكلف، حسب نوع البشرة.
كم ياخذ وقت عشان تحطين مكياج لربيعات العروس او اهلها او اي وحدة معزومة لعرس؟
المكياج العادي ممكن احطه بين 30 و 45 دقيقة
تسوين تنظيف للبشرة (فيشل) قبل المكياج؟
لا ما اسوي فيشل، بس العروس اذا حبت انها اتسوي فيشل قبل العرس فانصحها بفترة اسبوعين قبل العرس، عشان نتفادى أي مشاكل للبشرة بعد التنظيف، لانه عادة بعد فتح المسام وتنظيفها، في بعض البشرات اللي تتخلص سموم البشرة على شكل حبوب. فالبشرة لازم ترتاح اشوي وفترة اسبوع اتكون كفاية.
كم تاخذين حق البروفا؟ و وين فالعادة تسوين البروفا؟
بروفا مكياج العروس 800 درهم وراح ياخذ كحد اقصى ساعتين. ممكن احط لها نوعين من المكياج، كل نوع على عين وحدة عشان اتقارن واتقرر اللي يناسبها. و فالعادة البروفا تكون في البيت أو الفندق. سعر بروفا العروس لا يشمل مكياج العروس ليوم العرس.
شو نوع المكياج الي تستخدمينه؟
كلها ماركات عالمية.
كم سنة و انتي تمارسين هذه المهنة؟
انا في هالمجال من 8 سنوات. اشتغل بشكل رئيسي في دبي واسافر برع عشان احط مكياج لعروض أزياء، أحداث مهمة، جلسات تصوير، وأعراس.
هل تردين على المكالمات شخصياً ولا عندج مديرة مكتب؟
انا ارد على المكالمات شخصيا
حجز المواعيد يكون بالتلفون ولا بالايميل؟
ممكن الحجز عن طريق الايميل أوالتلفون. ممكن بعد اطرشون لي مسج على الموبايل مع اسم الزبون، تاريخ الحفلة، الوقت، كم شخص، المكان، و برد عليكم عشان التأكيد.
تسوين الشعر ولا تتعاملين ويا وحدة تسوي الشعر؟
انا خبيرة مكياج بس ممكن اوفر لزبايني ارقام تلفونات خبيرات تساريح وشعر، لآني ما اتعامل مع وحدة على وجه التحديد
إضافة تعليق جديد
- 16062 قراءة
- 5 تعليقات
- ارسل لصديق
التعليقات
بالتوفيق ان شاءالله
هل يوجد المزيد من الصور للمكياج
هاي تسلم يدج فعلا هل المكياج الحلو والروعه بس بقيت اسئل انه ابي اتعلم طرقت المكياج المخملي وكيف استعماله اذا عندج فيديو ما عليج امر ممكن اطرشينه علا ايميلي او شكرن
[شغل كثير نظيف وراقي ياريت نشوف ميكاب العروس حتى على عارضة ،وشكرا.]
ممكن صور لمكياج العيون الصغيرة؟
إضافة تعليق جديد